Trajneri i skuadrës italiane Pisa dhe njëherazi vëllai i trajnerit të Interit, Filipo Inzagi, ka folur me entuziazëm për finalen e ardhshme të Ligës së Kampionëve, ku Interi i Simone Inzagit do të përballet me Paris Saint-Germain. Në një intervistë për gazetën italiane La Stampa, Filipo vlerësoi maksimalisht punën e vëllait të tij dhe shprehu besimin se zikaltërit do të luftojnë për trofeun, pavarësisht se përballë kanë një skuadër të fuqishme si PSG.
“Simone është një profesionist serioz dhe i përgatitur mirë, po flas si koleg, jo vetëm si vëlla,” u shpreh Inzagi. “Formacioni 3-5-2, që shpesh përdoret nga trajnerët modernë, te Interi merr një dimension tjetër. Sulmojnë me kënaqësi, ofrojnë spektakël të pastër. Rezultatet flasin vetë – kjo do të jetë finalja e tij e dytë në dy vjet. Kjo është në ADN-në tonë.”
Filipo Inzagi gjithashtu konfirmoi praninë e tij në stadium për të ndjekur finalen nga afër dhe tha se, edhe pse PSG-ja shihet si favorite në letër, kjo nuk garanton asgjë në fushën e lojës. “PSG mund të duket favorite, ashtu si edhe Barcelona, por ishte Interi që kaloi në finale. Kjo tregon forcën dhe karakterin e skuadrës. Donaruma po bën gjëra të jashtëzakonshme, e kam parë të ndalë gjashtë-shtatë gjuajtje që vetëm një portier si ai mund t’i mbajë.”
Finalja e Ligës së Kampionëve në fund të majit pritet të jetë një duel i ashpër dhe emocionues, ku Interi do të kërkojë lavdinë evropiane, ndërsa Filipo Inzagi është një nga mbështetësit më të zjarrtë të këtij misioni.
