Ministria e Arsimit, Shkencës, Teknologjisë dhe Inovacionit (MAShTI) ka njoftuar se nga nesër, më 27 maj 2025, nis aplikimi për Provimin e Maturës Shtetërore. Aplikimi do të bëhet ekskluzivisht përmes platformës digjitale e-Kosova dhe do të jetë i hapur deri më 10 qershor 2025.
Sipas MAShTI, koordinatorët e shkollave do të kenë mundësinë të aprovojnë aplikimet e nxënësve në periudhën nga 1 deri më 11 qershor 2025.
Provimi i Maturës për vitin 2025 është planifikuar të mbahet më 21 qershor, ndërsa rezultatet pritet të publikohen më 30 qershor. Nxënësit që kalojnë testin do të mund të shkarkojnë certifikatën digjitale përmes të njëjtës platformë online.
Testi do të zhvillohet në një ditë të vetme dhe do të përfshijë katër lëndë: Gjuhë Shqipe, Gjuhë Angleze, Matematikë dhe një lëndë me zgjedhje nga nxënësi. Secila lëndë do të përmbajë 25 pyetje, duke e çuar numrin total të pyetjeve në 100.
Ministria u bën thirrje të gjithë maturantëve të respektojnë afatet dhe të sigurohen që aplikimi i tyre të bëhet në kohë përmes platformës e-Kosova.
