Sot në orën 16:15, “Estadi Olímpic Lluís Companys” në Montjuiç do të jetë skena e një përballjeje vendimtare: Barcelona pret Real Madridin në një “El Clasico” që mund të përcaktojë kampionin e këtij sezoni në La Liga.
Me vetëm katër ndeshje të mbetura dhe një diferencë prej katër pikësh mes dy rivalëve të përjetshëm, takimi i shumëpritur është më shumë se një klasik – është një finale e hershme. Fitorja për Barcelonën do ta afronte ndjeshëm ekipin e Hansi Flick me titullin kampion, duke i siguruar një epërsi komode tri javë para fundit. Ndërsa një fitore e Real Madridit në fushë të vështirë do të afronte skuadrën e Carlo Ancelottit vetëm një pikë prapa dhe do të rihapte garën për titull në mënyrën më dramatike të mundshme.
Në ndeshjen e parë mes dy skuadrave këtë sezon, Barcelona dominoi në “Santiago Bernabéu” me rezultatin 0-4, falë dy golave të Robert Lewandowskit dhe realizimeve të Jamalit e Raphinhës.
Gjithçka është në lojë: krenaria, historia dhe titulli. Spanja dhe e gjithë bota do të ndalin frymën për 90 minutat që mund të përcaktojnë kush do ta sundojë futbollin spanjoll në vitin 2025.
