Ajax, Arsenal e Tottenham me rrugë më të lehta; PSG, Real Madrid e Newcastle përballen me sfida të mëdha
Shorti i fazës së ligës në Ligën e Kampionëve UEFA për edicionin 2025/26 është hedhur, duke përcaktuar fatin e 36 skuadrave pjesëmarrëse. Formati i ri, i prezantuar sezonin e kaluar dhe i mirëpritur gjerësisht, zëvendëson fazën tradicionale të grupeve, duke vendosur që secili klub të luajë tetë ndeshje kundër kundërshtarëve të zgjedhur nga katër vazo të ndryshme.
Me ndihmën e yjeve të futbollit Zlatan Ibrahimovic dhe Kaka, shorti i kësaj vere ka dhënë skenare të favorshme për disa skuadra, por edhe “orare ferri” për të tjera.
Fituesit e shortit
Ajax doli ndoshta skuadra më me fat. Holandezët shmangën gjigantët më të frikshëm dhe do të përballen me Interin në shtëpi dhe Chelsean në transfertë nga Vazo 1, ndërsa ndeshjet ndaj Benficës dhe Villarrealit nga Vazo 2 shihen si të kalueshme. Përballjet me Olympiacos, Marseille, Galatasaray dhe Qarabag e bëjnë programin e tyre ndër më të lehtët në gjithë garën.
Arsenal gjithashtu mori një short të menaxhueshëm. Përballjet ndaj Bayern Munichut dhe Interit duken të vështira, por ndeshjet kundër Club Brugge, Olympiacos dhe Kairat japin hapësirë për pikë të sigurta.
Tottenham pritet të ketë një rrugëtim të balancuar. Megjithëse do të përballet me PSG-në në transfertë dhe Dortmundin në Londër, pjesa tjetër e orarit me rivalë si Villarreal, Slavia Pragë dhe Kopenhagen shihet si e favorshme.
Humbësit e shortit
Nga ana tjetër, disa gjigantë europianë nuk patën aspak fat.
PSG do të përballet me Bayern Munichun dhe Barcelonën që në fazën e ligës, duke e bërë rrugën e kampionëve në fuqi tepër të vështirë. Shtuar këtu edhe Atalantën, Leverkusenin, Tottenhamin dhe Newcastle, programi i tyre shihet si një nga më të vështirët.
Real Madrid nuk e ka më lehtë. “Los Blancos” do të përballen me Manchester Cityn, Barcelonën dhe Juventusin, ndërsa ndeshjet ndaj Marsejës, Olympiacosit dhe Kairatit e plotësojnë një listë që nuk fal gabime.
Newcastle, që vetëm së fundi është rikthyer në skenën më të madhe, ka një short brutal me Barcelona, PSG, Benfica, Leverkusen, PSV dhe Athletic Club.
Bayer Leverkusen dhe Club Brugge janë gjithashtu në mesin e humbësve, pasi kanë përpara një kalendar me kundërshtarë të nivelit të lartë, përfshirë Barcelonën, Bayern-in, PSG-në dhe Arsenalin.
Shorti i Ligës së Kampionëve 2025/26 ka krijuar kontraste të mëdha: disa skuadra të mëdha si Ajax, Arsenal e Tottenham shohin mundësi reale për kualifikim, ndërsa gjigantë si PSG dhe Real Madrid përgatiten për një betejë të fortë që nga faza e parë.
