Takimi i shumëpritur ndërmjet Këshillit Kombëtar Shqiptar (KKSh) dhe Trupit Koordinues ka dështuar të mbahet për shkak të mosmarrëveshjeve lidhur me praninë e flamurit kombëtar shqiptar në ambientet zyrtare të KKSh-së.
Sipas burimeve nga Spektri, delegacioni i Trupit Koordinues, i kryesuar nga Aleksandar Martinoviq dhe ushtruesi i detyrës së drejtorit Nenad Mitroviq, ka refuzuar të hyjë në zyrën ku ishte vendosur flamuri shqiptar, duke kërkuar që krahas tij të ishte vendosur edhe flamuri i Serbisë. Kërkesa nuk u pranua nga kreu i KKSh-së, Enkel Rexhepi, i cili insistoi se flamuri shqiptar përfaqëson simbolin kombëtar të komunitetit shqiptar në Luginën e Preshevës dhe se është i vendosur në përputhje me ligjet për përdorimin e simboleve të pakicave.
“Simbolet tona nuk janë provokim, por shprehje e identitetit dhe legjitimitetit institucional të përfaqësimit të shqiptarëve në Serbi”, u shpreh Rexhepi në një deklaratë për media pas dështimit të takimit.
Ngjarja është komentuar nga vëzhguesit si një tjetër dëshmi e tensioneve të vazhdueshme simbolike dhe politike në raportet ndërmjet përfaqësuesve shqiptarë në jug të Serbisë dhe autoriteteve shtetërore.
Për momentin nuk ka njoftime zyrtare për një datë të re të mundshme për takimin e shtyrë
