Barcelona e nisi sezonin e ri të La Ligas me fitore bindëse 3-0 ndaj Mallorcas, por trajneri Hansi Flick nuk u shfaq i kënaqur me mënyrën se si skuadra e tij menaxhoi ndeshjen.
Ndeshja: Gola, polemika dhe tensione
Në minutën e 8-të, Lamine Yamal shënoi golin e parë pas një krosimi të saktë, duke i dhënë katalanasve një epërsi të hershme. Vetëm pas 16 minutash, Ferran Torres dyfishoi shifrat me një gjuajtje të fortë, në një aksion të shoqëruar nga polemika, pasi Mallorca protestoi për një ndërprerje të munguar pas një dëmtimi në kokë të mbrojtësit Antonio Raillo.
Pjesa e parë u mbyll me tensione të larta: Mallorca mbeti me dy lojtarë më pak për shkak të kartonëve të kuq, ndërsa Raphinha u ndëshkua me të verdhë pas një ndërhyrjeje të ashpër, të cilën kundërshtarët pretenduan se duhej të ndëshkohej me karton të kuq.
Flick i pakënaqur: “Lojtarët luajtën vetëm me 50%”
Megjithëse Barcelona dominoi me epërsi numerike për mbi një pjesë të tërë, katalanasit shënuan vetëm edhe një gol tjetër, gjë që sipas Flick tregon mungesë përqendrimi.
“Nuk më pëlqeu loja. Pas dy golave dhe dy kartonëve të kuq, skuadra luajti vetëm me 50%. Mund të bëjmë shumë më mirë,” u shpreh trajneri gjerman për Mundo Deportivo.
Yamal, magji dhe kandidaturë për Topin e Artë
Ylli 18-vjeçar, Lamine Yamal, vulosi rezultatin në kohën shtesë me një supergol nga krahu i djathtë, duke e çuar shifrën në 3-0. Me dy gola në këtë ndeshje dhe një parasezon mbresëlënës, prodhimi i akademisë La Masia është tashmë pjesë e diskutimeve për çmimin prestigjioz Topi i Artë 2025.
“Është i jashtëzakonshëm, i motivuar dhe gjithmonë gati të shtyjë përpara. Ai është një lojtar i veçantë,” tha Flick për talentin e ri spanjoll.
Alternativat e Flick dhe sfidat e Barcelonës
Përveç Yamal, në këtë takim u aktivizuan edhe emra si Jules Kounde, Gavi, Dani Olmo dhe Marcus Rashford, duke i dhënë Flick mundësinë të alternojë formacionin në një sezon të ngjeshur me katër kompeticione.
Megjithatë, Barça vijon të përballet me sfida financiare. Klubi është në kërkim të një sulmuesi që do të zëvendësojë Robert Lewandowskin verën e ardhshme, ndërkohë që për momentin ka regjistruar në skuadër lojtarë të rinj si Joan Garcia dhe Marcus Rashford për këtë sezon.
