Forcat amerikane kanë sekuestruar një anije cisternë gjigante të naftës në brigjet e Venezuelës, duke ngritur tensionet mes Uashingtonit dhe regjimit të Nicolás Maduro. Presidenti amerikan, Donald Trump, e konfirmoi operacionin duke e quajtur cisternën “më të madhen e sekuestruar ndonjëherë”.
Prokurorja e Përgjithshme e SHBA-së, Pam Bondi, deklaroi se cisterna përdorej për transport të naftës së sanksionuar nga Venezuela dhe Irani. Ajo publikoi pamjet e operacionit, ku trupat amerikane zbarkojnë me helikopter në kuvertën e anijes.
Caracas reagoi ashpër, duke e cilësuar ndërhyrjen si “pirateri ndërkombëtare”. Ministri i Brendshëm venezuelian, Diosdado Cabello, akuzoi SHBA-të se po veprojnë si “piratë të detit të hapur”.
Operacioni, sipas CBS, u zhvillua me mbështetjen e helikopterëve të nisur nga aeroplanmbajtësja USS Gerald Ford. Në aksion morën pjesë trupa të Rojës Bregdetare, marinsa dhe njësi speciale.
Sipas SHBA-së, cisterna “Skipper” ka qenë e përfshirë në rrjete kontrabande nafte që financojnë organizata të sanksionuara, përfshirë Hezbollahun dhe Forcën Quds të Iranit. Anija dyshohet se ka falsifikuar pozicionet e saj të lundrimit.
Qeveria e Guajanës deklaroi se “Skipper” valëviste ilegalisht flamurin e tyre, pasi nuk është e regjistruar në atë shtet.
Sekuestrimi ka ndikuar menjëherë edhe në tregjet globale: çmimet Brent u rritën për shkak të frikës së ndërprerjes së furnizimit. Analistët paralajmërojnë se lëvizja mund të godasë më tej eksportet e Venezuelës.
Maduro, ndërkohë, e quajti SHBA-në “agresore” dhe paralajmëroi se vendi i tij nuk do të bëhet “koloni nafte”. Në një tubim, ai ironizoi me një këngë popullore: “Jo luftë, jini të lumtur”.
Sipas raporteve të BBC Verify, SHBA ka forcuar ndjeshëm praninë ushtarake në Karaibe muajt e fundit, duke nxitur spekulime për veprime të tjera të mundshme.
Ndërkohë, SHBA thotë se që nga shtatori ka kryer mbi 20 sulme ndaj anijeve të dyshuara për kontrabandë droge në rajon, ku kanë humbur jetën të paktën 80 persona.
