Pas betimit të 350 ushtarëve të rinj javën e kaluar, Forca e Sigurisë së Kosovës (FSK) ka shënuar sot një tjetër moment të rëndësishëm në procesin e saj të zhvillimit dhe profesionalizimit. 18 oficerë të rinj janë diplomuar dhe i janë bashkuar radhëve të ushtrisë së Kosovës, duke forcuar më tej kapacitetet mbrojtëse të vendit.
Lajmin e ka bërë të ditur kryeministri Albin Kurti, përmes një postimi në rrjetin social Facebook, ku theksoi rëndësinë e rritjes së vazhdueshme të kapaciteteve ushtarake dhe profesionale të ushtrisë.
“Ushtria jonë po bëhet më e fortë e më e përgatitur çdo ditë e më shumë. Me dëshmorët e kombit në zemër dhe mësimet profesionale në mendje, ua uroj diplomimin oficerëve tanë të rinj. Paçin shëndet e suksese, çdoherë e kudo!”, – shkroi Kurti.
Ky zhvillim vjen në një kohë kur Kosova po thellon angazhimet për ngritjen e standardeve të FSK-së në përputhje me kërkesat e bashkëpunimit ndërkombëtar dhe synimet për anëtarësim në NATO.
Në një ceremoni solemne, oficerët e rinj u diplomuan pas një trajnim të specializuar dhe të suksesshëm, duke u përgatitur për t’i shërbyer me profesionalizëm dhe përkushtim Republikës së Kosovës.
