Presidenti i Francës, Emmanuel Macron, ka paralajmëruar ndalimin e përdorimit të rrjeteve sociale për fëmijët nën moshën 15 vjeç, nëse nuk arrihet një marrëveshje e përbashkët në nivel evropian brenda disa muajsh. Deklarata e tij u bë gjatë një interviste për televizionin publik France 2, si reagim ndaj një ngjarjeje tragjike që tronditi opinionin publik: vrasjes së një asistenteje mësuese nga një nxënës 14-vjeçar pranë një shkolle të mesme.
“Shoqëritë tona nuk mund të mbyllin sytë para ndikimit të dëmshëm të rrjeteve sociale te fëmijët,” deklaroi Macron. “Duhet të ndalojmë qasjen e fëmijëve nën 15 vjeç në mediat sociale. Nëse nuk ka mobilizim të përbashkët evropian, Franca do të veprojë e vetme. Nuk mund të presim më.”
Presidenti theksoi se platformat si TikTok, Instagram dhe Snapchat po ndikojnë negativisht në shëndetin mendor të të miturve, duke i ekspozuar ata ndaj përmbajtjeve të dhunshme, presionit social dhe abuzimit psikologjik në internet.
Përveç ndalimit të rrjeteve sociale, Macron njoftoi edhe masa të reja për kufizimin e aksesit të të miturve në armë të ftohta. Një nga hapat e parë do të jetë ndalimi i shitjes së thikave në internet për personat nën 15 vjeç, si pjesë e një strategjie më të gjerë për të parandaluar dhunën në shkolla dhe komunitet.
Ky paralajmërim i Presidentit francez vjen mes thirrjeve në rritje nga ekspertë të sigurisë dhe organizata prindërore për të forcuar mbrojtjen e fëmijëve në epokën digjitale. Vendimi i mundshëm pritet të ndezë debat brenda Bashkimit Evropian për rolin e përbashkët në rregullimin e platformave sociale dhe ruajtjen e sigurisë së të miturve në internet.
