Kryeministrja e Danimarkës, Mette Frederiksen, ka deklaruar se vendi i saj është i gatshëm të bëjë gjithçka për të arritur një marrëveshje me Shtetet e Bashkuara të Amerikës lidhur me Groenlandën, me një vijë të kuqe të panegociueshme: dorëzimi i ishullit nuk vjen në konsideratë.
E pyetur drejtpërdrejt nëse ekziston mundësia që Groenlanda t’i jepet SHBA-ve, Frederiksen u shpreh prerazi se një skenar i tillë është i paimagjinueshëm.
“Jo, askush nuk mund ta imagjinojë një gjë të tillë”, tha ajo në një intervistë për emisionin “Maischberger” në televizionin publik gjerman ARD.
Deklarata e saj vjen pas insistimit të presidentit amerikan Donald Trump, i cili javën e kaluar përsëriti qëndrimin se SHBA-të duhet të kenë pronësinë e Groenlandës, territor autonom nën sovranitetin danez. Megjithatë, Trump përjashtoi përdorimin e forcës dhe tha se bisedimet e tij në Davos me sekretarin e përgjithshëm të NATO-s, Mark Rutte, kishin krijuar një “kornizë” për një marrëveshje të ardhshme.
Në këtë kontekst, Trump tërhoqi edhe kërcënimet për tarifa shtesë ndaj vendeve evropiane që kundërshtonin planet e tij për Groenlandën.
Frederiksen theksoi se Danimarka po ndjek një qasje diplomatike, duke bashkëpunuar ngushtë me partnerët evropianë.
“Kur Evropa është e bashkuar dhe flet me një zë, atëherë ka rezultate”, u shpreh ajo, duke shtuar se ende nuk dihet se sa do të zgjasin negociatat me Uashingtonin.
Kryeministrja daneze shmangu dhënien e detajeve konkrete mbi përmbajtjen e bisedimeve, por nënvizoi qartë se ruajtja e sovranitetit të Danimarkës mbi Groenlandën mbetet parim themelor dhe i panegociueshëm.
