Ejup Maqedonci ka bërë të ditur se Forca e Sigurisë së Kosovës është vënë në gatishmëri të shtuar pas përkeqësimit të situatës si pasojë e reshjeve të dendura të shiut në disa pjesë të vendit.
Sipas Maqedoncit, me urdhër të Komandantit të FSK-së dhe bazuar në vlerësimin e Shtabit të Përgjithshëm, njësitë e FSK-së janë aktivizuar për të ofruar mbështetje të drejtpërdrejtë për autoritetet civile.
Ekipet e FSK-së kanë intervenuar në shpëtimin e jetëve të qytetarëve, evakuimin e personave të rrezikuar, si dhe në mbështetjen e institucioneve qendrore dhe lokale për strehimin e tyre.
“Njësitë tona kanë qenë në terren dhe kanë reaguar me shpejtësi për të ndihmuar qytetarët e prekur nga situata e krijuar,” ka theksuar Maqedonci.
Autoritetet u bëjnë thirrje qytetarëve të tregojnë kujdes maksimal dhe të ndjekin udhëzimet e institucioneve përgjegjëse, derisa situata të stabilizohet plotësisht.
