Ekipi i Forcës së Sigurisë së Kosovës (FSK) po kryen përgatitjet përfundimtare për të marrë pjesë në garën ndërkombëtare “Cambrian Patrol”, që mbahet këtë vit në Uells, Mbretëria e Bashkuar.
Për disa vite me radhë, FSK ka qenë pjesë e kësaj ngjarjeje prestigjioze, duke shënuar rezultate të spikatura. Në përgatitjet e fundit, ekipit të Kosovës iu bashkua edhe një skuadër nga Forcat e Armatosura të Republikës së Shqipërisë, e cila po sfidohet me skenarë të ngjashëm me ato të garës për të rritur gatishmërinë dhe përvojën e pjesëmarrësve.
Pjesëmarrja e FSK-së në “Cambrian Patrol” jo vetëm që forcon ndërveprimin dhe bashkëpunimin me ushtrinë britanike dhe forcat partnere ndërkombëtare, por gjithashtu kontribuon në zhvillimin e aftësive taktike individuale dhe të grupit për ushtarakët kosovarë.
