Forca e Sigurisë së Kosovës (FSK) ka përmbyllur me sukses “Kursin Bazik për Xhenier Luftarak”, në kuadër të përforcimit të kapaciteteve luftarake dhe aftësive teknike të pjesëtarëve të saj.
Trajnimi është zhvilluar nën drejtimin e instruktorëve të Regjimentit të Xhenios së Gardës Kombëtare, me mbështetje të plotë nga Komanda e Doktrinës dhe Stërvitjes dhe Komanda e Forcave Tokësore të FSK-së.
Gjatë kursit, pjesëmarrësit janë trajnuar në një sërë aftësish jetike për operacionet luftarake, përfshirë ndërtimin e fortifikimeve në terrene fushore dhe urbane, kalimin e pengesave ujore dhe zonave të minuara, si dhe përdorimin e eksplozivëve për çarjen ose krijimin e pengesave taktike.
Sipas FSK-së, ky trajnim ka për qëllim rritjen e gatishmërisë operacionale dhe aftësive taktike të pjesëtarëve të saj, duke e përgatitur strukturën për sfidat e mundshme në misionet e ardhshme, si brenda ashtu edhe jashtë vendit.
Ky kurs përbën një hap të rëndësishëm drejt zhvillimit profesional të trupave të FSK-së, në përputhje me standardet e aleatëve ndërkombëtarë dhe përkushtimin për një forcë të përgatitur dhe të ndërveprueshme në kuadër të sigurisë rajonale dhe globale.
