Pas një nate me kthjellime të pjesshme dhe praninë e herëpashershme të vranësirave, e shtuna në Kosovë sjell përmirësim gradual të kushteve atmosferike. Megjithatë, parashikimet tregojnë se përveç intervaleve me diell, në orët e pasdites pritet të ketë mundësi për ndonjë rrebesh lokal shiu, të shoqëruar me vetëtima dhe bubullima.
Temperaturat minimale do të luhaten nga 2 deri në 5°C, me mundësi që në zonat kodrinore-malore ato të zbresin deri në 0°C, çka mund të sjellë edhe ngrica të dobëta në disa rajone. Temperaturat maksimale gjatë ditës do të shënojnë rritje dhe do të arrijnë vlerat nga 14 deri në 17°C.
Rajoni – Reshje afatshkurtra dhe mëngjes i ftohtë në veri të Shqipërisë dhe Malit të Zi
Ngjashëm me Kosovën, edhe Shqipëria, Maqedonia e Veriut, Lugina e Preshevës dhe Mali i Zi do të përjetojnë mot me alternime mes vranësirave dhe intervaleve me diell gjatë ditës së shtunë. Mëngjesi pritet të jetë më i ftohti në veri të Malit të Zi dhe në zonat e thella veriore të Shqipërisë.
Reshje të shkurtra shiu, të shoqëruara me vetëtima dhe bubullima të izoluara, do të shfaqen në disa zona. Në viset më të larta malore, reshjet e borës mbeten ende të mundshme.
Institucionet e meteorologjisë u bëjnë thirrje qytetarëve të kenë kujdes në zonat ku parashikohet reshje dhe të ndjekin njoftimet përditësuese për motin.
