Ish-deputeti Gani Geci ka reaguar pas deklaratës së ministrit në detyrë të Bujqësisë, Faton Peci, lidhur me një debat të fundit mbi një telefonatë të përfolur mes kryetarit të Kuvendit, Glauk Konjufca, dhe vetë Gecit.
Në një prononcim për media, Geci sqaroi se mesazhi që i kishte dërguar ministrit Peci nuk kishte të bënte me ndonjë ofertë për bashkëpunim politik, por me një çështje konkrete që lidhet me prona të dyshuara si të uzurpuara.
“E dëgjova një intervistë të Faton Pecit dhe u habita. Kishte thënë se Gani Geci i ka dërguar SMS. Është e vërtetë se jemi takuar rrugës nga Gjermania për në Kosovë dhe kemi shkëmbyer numrat. Pas konferencës së tij për kthimin e pronave të Ministrisë së Bujqësisë, i dërgova një mesazh për disa prona që dyshoj se janë të uzurpuara. Nuk kam marrë përgjigje. Kurrë në jetë nuk i dërgoj dikujt SMS për bashkëpunim,” theksoi Geci.
Ai shtoi se më parë kishte menduar se Lista Guxo ishte pjesë e LDK-së, por tani i akuzon ata për afërsi me Vetëvendosjen dhe “markistët-leninistët”.
Ndërkohë, më herët gjatë ditës, ministri në detyrë Faton Peci komentoi për debatin rreth telefonatës së përfolur, duke deklaruar se nuk ka njohuri nëse ajo ka ndodhur apo jo, por se ka respekt për familjen Geci.
“Nuk e di a ka ndodhur telefonata, por kam respekt për familjen Geci. Një mesazh miqësor për z.Geci: nuk është pjekuri politike që komunikimet private – si mesazhet apo thirrjet – të shfaqen në media. Edhe pas zgjedhjeve, nuk është etike që të bëhen publike telefonatat që dikush mund të ketë pranuar,” tha Peci.
Debati ka nxitur reagime në opinion, ndërsa akuzat dhe kundërakuzat mes figurave politike vazhdojnë të krijojnë përplasje në skenën politike të vendit.
