Më shumë se 600 ditë pas shpërthimit të luftës në Rripin e Gazës, pas mbi 100.000 tonësh eksplozivë të përdorur dhe më shumë se 60.000 viktimave, gjysma prej të cilëve gra dhe fëmijë, territori i Gazës është shndërruar në një peizazh të rrënuar që shumë e përshkruajnë si “hënor”. Mbetjet e pallateve, kraterët dhe rrënojat që dikur ishin shtëpi, shkolla, spitale apo xhami kanë mbuluar tokën dikur bregdetare dhe me palma mesdhetare.
Sipas një raporti të ISPI, bazuar në të dhëna të Kombeve të Bashkuara dhe burimeve zyrtare ndërkombëtare, mbi 70% e ndërtesave të Gazës janë dëmtuar, ndërsa 28% e tyre janë shkatërruar plotësisht. Më shumë se 800 xhami janë rrënuar, dhe 80% e spitaleve e klinikave janë jashtë funksionit. Nga sulmet ndaj infrastrukturës shëndetësore janë vrarë 950 persona, përfshirë mbi 100 punonjës mjekësorë.
Lufta nisi pas sulmit të Hamasit më 7 tetor 2023, që vrau 1.200 izraelitë dhe rrëmbeu 250 të tjerë. Pas kësaj, Izraeli, nën drejtimin e kryeministrit Benjamin Netanyahu, nisi ofensivën më të madhe ushtarake ndaj Gazës në dekada.
Emergjenca humanitare në përmasa katastrofike
Situata humanitare është e zymtë: 93% e popullsisë përjeton krizë ushqimore, ndërsa 12% jeton në kushte “katastrofike”, sipas OKB-së. 181 persona kanë vdekur nga uria, përfshirë 94 fëmijë, njofton Ministria e Shëndetësisë në Gaza, e drejtuar nga Hamasi.
Para luftës, Gaza merrte rreth 600 kamionë ndihma në ditë. Sot, edhe pas rihapjes së kufirit nga qeveria izraelite, numri nuk i kalon 400 kamionë në dy javë. Kombet e Bashkuara e cilësojnë këtë si “të pamjaftueshëm dhe në kundërshtim me parimet humanitare”. Qendrat e shpërndarjes, tashmë të kontrolluara nga Gaza Humanitarian Foundation, përballen me turma të mëdha të njerëzve të uritur dhe të dëshpëruar.
Angelo Rusconi nga organizata Mjekët pa Kufij (MSF), që operon në Gaza City, ndan fotografi tronditëse – fëmijë të kequshqyer me krahë sa një gisht, një dëshmi e dramës që përjeton brezi më i ri në këtë konflikt të zgjatur.
Gratë dhe fëmijët, viktimat më të mëdha
Rreth 700.000 gra jetojnë në një krizë të heshtur të mungesës së produkteve higjienike menstruale për dy vjet, duke përballur pasoja të rënda shëndetësore. Ndërkohë, rreth një milion fëmijë kanë mbetur jashtë sistemit arsimor për 20 muaj.
Zhvendosje dhe sulme të vazhdueshme
Që nga përfundimi i armëpushimit më 18 mars, mbi 632.000 persona janë zhvendosur sërish, ndërsa nga fillimi i majit janë vrarë të paktën 28 punonjës humanitarë, duke e çuar numrin total në 452.
Aktualisht, sulmet izraelite kanë avancuar nga veriu në jug të Rripit, duke prekur edhe zonën e Rafahut – një nga vendet e fundit të strehimit për qindra mijëra të zhvendosur.
