Presidenti amerikan Donald Trump ka njoftuar formimin e Bordit Ekzekutiv të Paqes për Gazën, një strukturë që synon të operacionalizojë Planin Global për stabilizimin dhe rindërtimin afatgjatë të enklavës palestineze.
Në përbërje të bordit janë figura kyçe politike dhe ekonomike, përfshirë Sekretarin e Shtetit Marco Rubio, të dërguarit Steve Witkoff dhe Jared Kushner, ish-kryeministrin britanik Tony Blair, si dhe drejtues të rëndësishëm financiarë si Marc Rowan, Ajay Banga dhe Robert Gabriel.
Sipas deklaratës së Shtëpisë së Bardhë, bordi përbëhet nga udhëheqës me përvojë në diplomaci, zhvillim, infrastrukturë dhe strategji ekonomike. Rolet politike dhe portofolët konkretë të secilit anëtar pritet të publikohen së shpejti.
“Çdo anëtar do të mbikëqyrë një portofol kritik për stabilizimin e Gazës, duke përfshirë forcimin e qeverisjes, rindërtimin, marrëdhëniet rajonale, tërheqjen e investimeve dhe mobilizimin e kapitalit në shkallë të gjerë”, thuhet në deklaratë.
Nickolay Mladenov, ish-i dërguari special i OKB-së për Lindjen e Mesme dhe ish-ministër i Jashtëm i Bullgarisë, është emëruar Përfaqësues i Lartë për Gazën. Ai do të veprojë si ndërlidhës në terren mes Bordit të Paqes dhe një komiteti teknik palestinez me 15 anëtarë.
Shtëpia e Bardhë thekson se SHBA do të punojë ngushtë me Izraelin, vendet kryesore arabe dhe komunitetin ndërkombëtar për zbatimin e Planit Global, duke u bërë thirrje të gjitha palëve të bashkëpunojnë me Bordin e Paqes dhe Forcën Ndërkombëtare të Stabilizimit.
Ndërkohë, nga Tokio, kryeministrja italiane Giorgia Meloni deklaroi se Italia është e gatshme t’i bashkohet Bordit të Paqes, duke shtuar se Roma është në pritje të përcaktimit të roleve politike brenda kësaj strukture.
Emërime të tjera pritet të shpallen në javët në vijim.
