Një grup redaktorësh dhe gazetarësh të Radio Televizionit të Kosovës (RTK) kanë reaguar ashpër ndaj vendimit të menaxhmentit për t’i përjashtuar nga moderimi i emisioneve kryesore, duke e cilësuar atë si “arbitrar dhe joligjor”.
Në një reagim publik të shpërndarë në Facebook, gazetarja dhe moderatorja Blerta Foniqi Kabashi tha se vendimi iu komunikua të premten, në fund të orarit të punës, pa asnjë paralajmërim. Sipas saj, bëhet fjalë për ndalimin e moderimit të Magazinës së orës 17:00 dhe Lajmeve të orës 23:00.
“Ky është një akt arbitrar, një censurë alarmante në Transmetuesin Publik. Vendimi nuk ka asnjë bazë ligjore dhe vjen në një moment kur RTK-ja nuk ka Bord funksional, i vetmi organ që mund të ndryshojë skemën programore,” thuhet në reagim.
Gazetarët po ashtu theksuan se presioni dhe akuzat e pabaza nga eprorët kanë qenë të vazhdueshme, duke e bërë të vështirë ushtrimin e detyrave profesionale. Ata shtuan se heqja e emisioneve është e lidhur drejtpërdrejt me përmbajtjen e tyre kritike ndaj pushtetit.
“Vendimi ka vetëm një qëllim: heshtjen e zërit të panënshtruar dhe profesional brenda Transmetuesit Publik. Ky është një alarm serioz për demokracinë në vend,” shkruajnë redaktorët.
Në deklaratë janë nënshkruar: Blerta Foniqi Kabashi, Meneta Zekaj Nushi, Jehona Zhitia, Edona Musa, Arton Mulliqi dhe Valon Bajrami, të cilët paralajmëruan se do të ndjekin të gjitha rrugët ligjore për të mbrojtur të drejtat e tyre.
