Sot shënohen gjashtë vjet nga konfirmimi i rasteve të para me COVID-19 në Kosovë. Rastet e para u diagnostikuan më 13 mars 2020 në Departamentin e Mikrobiologjisë në Institutin Kombëtar të Shëndetësisë Publike të Kosovës (IKSHPK), duke shënuar fillimin e përballjes së vendit me pandeminë që preku mbarë botën.
Sipas të dhënave zyrtare, nga 13 marsi i vitit 2020 deri më 13 mars 2026, në Kosovë janë testuar mbi 2 milionë mostra për virusin SARS-CoV-2. Gjatë kësaj periudhe janë konfirmuar gjithsej 276,300 raste pozitive me COVID-19, ndërsa 3,238 persona kanë humbur jetën si pasojë e virusit.
Autoritetet shëndetësore vlerësojnë se, pavarësisht se pandemia ishte një sfidë e panjohur për Kosovën dhe për gjithë botën, institucionet arritën të reagojnë dhe të menaxhojnë situatën përmes koordinimit dhe bashkëpunimit ndërinstitucional.
Sipas tyre, shkëmbimi i informatave në kohë reale dhe vendimmarrja e përbashkët ndërmjet institucioneve dëshmuan se bashkëpunimi është një nga faktorët kryesorë për përballimin e krizave të mëdha shëndetësore.
Gjashtë vjet pas rasteve të para, institucionet thonë se sistemi i shëndetit publik në Kosovë është më i përgatitur për të identifikuar, monitoruar dhe reaguar ndaj sfidave të ngjashme në të ardhmen.
