Pas disa ditësh kërkimesh, është gjetur vajza e mitur që ishte raportuar si e zhdukur në Mitrovicën e Veriut. Sipas njoftimit të Policisë së Kosovës, më 26 korrik 2025, familjarët kishin paraqitur rastin në Stacionin Policor të Mitrovicës së Veriut, duke raportuar largimin e vajzës nga banesa dhe mungesën e çdo informacioni mbi vendndodhjen e saj.
Menjëherë pas raportimit, Prokurori i Shtetit urdhëroi inicimin e rastit “Person i zhdukur”, ndërsa policia ndërmori të gjitha veprimet operative dhe hetimore të nevojshme, përfshirë njoftimin e pikave kufitare dhe stacioneve të tjera relevante në mbarë vendin.
Më 30 korrik 2025, vajza e mitur është paraqitur vetë në stacionin policor, e shoqëruar nga prindi i saj. Pas kryerjes së procedurave përkatëse, rasti do të trajtohet në procedurë të rregullt, njoftoi Policia.
Policia e Kosovës thekson përkushtimin e saj të vazhdueshëm për garantimin e sigurisë dhe ndihmën ndaj qytetarëve. Institucioni apelon që në raste të ngjashme, qytetarët të bashkëpunojnë me organet e rendit duke raportuar menjëherë çdo rast shqetësues në numrin emergjent 192.
