Presidenti gjerman Frank-Walter Steinmeier po zhvillon një vizitë tre-ditore në Mbretërinë e Bashkuar, ku ai dhe kryeministri britanik Keir Starmer shënuan një kapitull të ri në marrëdhëniet mes dy vendeve pas periudhës së tensionuar të shkaktuar nga Brexit-i.
Steinmeier u shpreh optimist pas takimit me Starmer, duke theksuar se Berlini dhe Londra po rikthehen drejt një partneriteti të fortë dhe të domosdoshëm përballë sfidave globale. “Në një botë që po ndryshon me shpejtësi dhe me kërcënime të shumta, duhet të afrohemi dhe të punojmë së bashku”, tha ai.
Kryeministri Starmer vlerësoi bashkëpunimin e dy vendeve në mbështetjen ushtarake dhe ekonomike ndaj Ukrainës, si dhe përpjekjet e përbashkëta në fushën e migracionit, tregtisë dhe rritjes ekonomike. Ai theksoi se marrëdhëniet Londër–Berlin “janë më të forta se vitet e fundit”.
Steinmeier nënvizoi rëndësinë e Marrëveshjes së Kensingtonit, e nënshkruar në korrik, e cila synon të thellojë bashkëpunimin ushtarak dhe ekonomik mes Britanisë së Madhe dhe Gjermanisë. Marrëveshja parashikon edhe mundësinë e ndërtimit të një lidhjeje të drejtpërdrejtë hekurudhore mes dy shteteve, një projekt që po konsiderohet seriozisht.
Presidenti gjerman u prit në aeroportin Heathrow nga Princi William dhe Duka e Cornwall-it, ndërsa axhenda e tij përfshin edhe një vizitë të ngarkuar me simbolikë në qytetin Coventry. Të premten, Steinmeier pritet të vendosë një kurorë në rrënojat e katedrales së vjetër të qytetit – një vend i shenjuar nga bombardimet gjermane në Luftën e Dytë Botërore – si gjest i pajtimit dhe kujtesës historike.
Vizita e Steinmeier pritet të konsolidojë më tej raportet britaniko–gjermane, duke sinjalizuar një epokë të re bashkëpunimi strategjik mes dy ekonomive më të mëdha të Evropës Perëndimore.