Ushtria gjermane duhet të dyfishojë numrin e trupave të saj për të përmbushur objektivat e rinj të NATO-s dhe për të përballuar rrezikun në rritje nga Rusia. Kështu ka paralajmëruar Shefi i Ushtrisë, Alfons Mais, në një dokument konfidencial të siguruar nga Reuters.
Në letrën e tij të 2 shtatorit, drejtuar shefit të shtabit të mbrojtjes Carsten Breuer, Mais thekson se arritja e objektivave është “e pamundur” me kapacitetet aktuale: vetëm 62,000 trupa aktive dhe 37,000 joaktive. Sipas tij, deri më 2029 ushtria duhet të arrijë gatishmërinë e plotë luftarake, ndërsa deri në vitin 2035 të ofrojë kapacitetet që Gjermania ka premtuar ndaj NATO-s.
Gjermania ka nisur tashmë rritjen e angazhimeve në krahun lindor të aleancës, përfshirë krijimin e një brigade në Lituani me rreth 5,000 trupa dhe patrullime detare në Detin Baltik për të parandaluar sabotimet nënujore.
Mais kërkon rreth 45,000 trupa shtesë deri në vitin 2029, vit kur NATO parashikon se Rusia mund të jetë e gatshme për një sulm të gjerë. Deri më 2035, nevoja totale e trupave shtesë arrin në 90,000, përfshirë edhe 10,000 të tjerë për mbrojtjen territoriale.
Sipas një vlerësimi fillestar, Gjermania duhet të arrijë në 460,000 personel ushtarak: 260,000 aktivë dhe 200,000 rezervistë. Aktualisht, Bundeswehr mbetet larg edhe objektivit të vitit 2018 për 203,000 trupa, duke vuajtur një mungesë prej rreth 20,000 efektivësh.
Ministri i Mbrojtjes, Boris Pistorius, në qershor kishte paralajmëruar se do të nevojiteshin deri në 60,000 ushtarë shtesë në të gjitha degët e ushtrisë. Ndërkohë, Ministria e Mbrojtjes në Berlin ka refuzuar të komentojë mbi dokumentin e Mais, duke përmendur natyrën e tij konfidenciale.
