Kancelari gjerman Friedrich Merz deklaroi se Berlini është gati të rrisë ndjeshëm mbështetjen ushtarake për Ukrainën, pas valës së fundit të sulmeve ruse që ai i quajti “luftë terrori kundër popullsisë civile”. Gjatë një konference të përbashkët me kryeministrin e Suedisë, Ulf Kristersson, Merz njoftoi se Gjermania do t’i furnizojë forcat ukrainase me sisteme goditjeje me rreze të gjatë, pa zbuluar detaje për shkak të “ndjeshmërisë së informacionit”.
“Po bëjmë gjithçka për të forcuar mbrojtjen ajrore të Ukrainës. Prej muajsh po punojmë me Kievin për implementimin e sistemeve të goditjes me rreze të gjatë. Kemi rënë dakord që disa gjëra të mos i diskutojmë publikisht — paqartësia ndaj Rusisë është e domosdoshme,” tha Merz.
3 miliardë euro të tjera, por me kushte
Kancelari njoftoi gjithashtu se në vitin e ardhshëm Gjermania do të vërë në dispozicion 3 miliardë euro shtesë në ndihmë ushtarake, me kusht që Ukraina të mbetet “partner i besueshëm” dhe të thellojë betejën kundër korrupsionit. Ai iu referua skandalit të fundit në qeverinë ukrainase, duke kërkuar “veprim të pamëshirshëm” për ta çrrënjosur korrupsionin — një element kyç edhe për rrugën e integrimit evropian.
Kryeministri suedez Kristersson mbështeti të njëjtën linjë, duke thënë se duhet folur “shumë hapur” për korrupsionin në Ukrainë dhe se ndihma për Kievin duhet të rritet në të gjitha drejtimet: ushtarak, humanitar dhe ekonomik.
Asetet ruse të ngrira, “arma diplomatike e BE-së”
Merz përsëriti thirrjen për përdorimin e aseteve të ngrira ruse në Evropë, duke kërkuar marrëveshje ndërmjet vendeve të BE-së brenda këtij viti.
“S’ka mjet më të fuqishëm presioni për ta sjellë Moskën në tryezën e bisedimeve,” u shpreh ai.
Ai dënoi edhe goditjet ruse ndaj zonave civile, duke i quajtur “sulme të pastër terrori”, dhe bëri të ditur se Berlini po koordinon vazhdimisht me SHBA-në, në dritën e raportimeve për kontakte të fshehta mes Uashingtonit dhe Moskës.
Ndryshon skema e përfitimeve për refugjatët ukrainas
Në një tjetër vendim të rëndësishëm, qeveria gjermane njoftoi se refugjatët ukrainas që mbërrijnë pas datës 1 prill 2025 nuk do të marrin më përfitimin social Bürgergeld, por ndihma më të ulëta, të njëjta me ato të kërkuesve të azilit. Sipas Ministrisë së Punës, kjo masë synon “barazi trajtimi me refugjatë nga vendet e tjera”.
Ky zhvillim vjen në një moment tensionesh të rritura në frontin ukrainas dhe debatësh të forta brenda BE-së për ritmin e mbështetjes ndaj Kievit.
