Forcat e armatosura të Gjermanisë kanë marrë detyrë që brenda tre vjetësh të pajisen me të gjitha mjetet e nevojshme për të mbrojtur territorin e NATO-s nga një sulm i mundshëm rus. Lajmin e bëri të ditur shefja e Zyrës për Prokurim Ushtarak, Annette Lehnigk-Emden, e cila theksoi se të gjitha pajisjet duhet të jenë të blera deri në vitin 2028.
“Gjithçka që nevojitet për të përgatitur plotësisht mbrojtjen e shtetit duhet të jetë në dispozicion deri atëherë,” tha ajo në një intervistë për gazetën gjermane Tagesspiegel.
Në të njëjtën linjë, shefi i mbrojtjes gjeneral Carsten Breuer paralajmëroi se Rusia mund të nisë një “sulm të shkallës së gjerë” ndaj territoreve të NATO-s, në veçanti në vendet baltike, deri në vitin 2029. Ai shtoi se ka indikacione për grumbullim të municioneve dhe tankeve që do të mund të përdoren në një ofensivë të tillë.
Qeveria e re gjermane, e drejtuar nga kancelari Friedrich Merz, ka vendosur që riarmatosja e ushtrisë të jetë një nga prioritetet kryesore të saj, duke ndarë qindra miliarda euro për blerjen e pajisjeve të rënda, përfshirë tanket kundërajrore Skyranger. Merz synon transformimin e ushtrisë gjermane në “ushtrinë konvencionale më të fuqishme në Evropë”.
Përpjekjet për përmirësimin e kapaciteteve mbrojtëse kanë filluar edhe gjatë qeverisjes së mëparshme të Olaf Scholzit, pas nisjes së luftës nga Rusia në Ukrainë në vitin 2022.
Në nivel ndërkombëtar, presidenti amerikan Donald Trump u ka bërë thirrje vendeve anëtare të NATO-s që të rrisin shpenzimet ushtarake nga 2% në 5% të Prodhimit të Brendshëm Bruto (GDP).
Ministri gjerman i Mbrojtjes, Boris Pistorius, ka deklaruar së fundmi se ushtria do të ketë nevojë për 50,000 deri në 60,000 ushtarë të rinj në vitet në vijim për të përmbushur kërkesat e mbrojtjes së NATO-s. Aktualisht, ushtria gjermane numëron mbi 180,000 ushtarë, ndërsa plani është që kjo shifër të rritet në 203,000 deri në vitin 2031.
