Gjilani dhe rajoni i Anamoravës po përballen me braktisje institucionale dhe mungesë investimesh, sipas nënkryetarit të LDK-së, Lutfi Haziri. Në një reagim publik, Haziri ka ngritur shqetësimin për ndërprerjen totale të punimeve në Autostradën e Gjilanit, duke theksuar se në kantier nuk ka asnjë makineri pune, përveç rojeve të sigurisë.
Ai akuzoi Qeverinë për papërgjegjësi dhe mungesë rezultatesh, ndërsa kritikoi edhe Kuvendin, duke thënë se as ai nuk funksionon më. “Gjilani është lënë pas dore, pa plane e pa vizion”, theksoi Haziri, duke shtuar se ky projekt ka qenë për të “projekti i zemrës”.
Ish-kryetari i Gjilanit njoftoi se do të vizitojë të gjitha kantieret e ndërtimit në Kosovë për të paraqitur realitetin në terren dhe për t’i treguar qytetarëve të vërtetën për gjendjen e infrastrukturës.
