Gjykata Speciale në Hagë pritet të bëjë sot publik vendimin lidhur me mocionin e përbashkët të ekipeve mbrojtëse për të rrëzuar pjesë të caktuara të aktakuzës për krime lufte dhe krime kundër njerëzimit në rastin e njohur si “Thaçi dhe të tjerët”.
Seanca është paraparë të nisë në orën 09:00 dhe përbën një moment kyç në ecurinë e këtij procesi gjyqësor të profilit të lartë.
Mbrojtja kërkon rrëzimin e akuzave
Mocioni në fjalë, i dorëzuar nga mbrojtja e ish-krerëve të UÇK-së para më shumë se një muaji, synon të godasë ligjërisht themelet e disa pikave të aktakuzës së ngritur nga Zyra e Prokurorit të Specializuar (ZPS).
ZPS-ja kishte afat të përgjigjej deri më 14 korrik, por e dërgoi kundërpërgjigjen më herët, më 7 korrik. Vendimi i sotëm pritet të japë indikacionet e para për qëndrimin e trupit gjykues karshi pretendimeve të mbrojtjes dhe forcës juridike të akuzës.
Përballja e parë me qëndrimin e trupit gjykues
Kjo do të jetë hera e parë që opinioni publik dhe palët e përfshira do të shohin qasjen konkrete të trupit gjykues ndaj aktakuzës dhe ndaj vetë të akuzuarve: Hashim Thaçi, Kadri Veseli, Rexhep Selimi dhe Jakup Krasniqi.
Çështja e ngritur për krime lufte dhe krime kundër njerëzimit mbetet një nga proceset më të ndjeshme dhe me jehonë të madhe politike dhe historike për Kosovën, që po ndiqet nga afër si në vend ashtu edhe në skenën ndërkombëtare.
