Gjykata Kushtetuese e Republikës së Kosovës ka reaguar ashpër ndaj deklarimeve të fundit të zyrtarëve të lartë shtetëror dhe të zgjedhurve politikë, duke i cilësuar ato si të pamatura dhe të rrezikshme për rendin kushtetues.
Në reagimin zyrtar thuhet se pavarësia e Gjykatës Kushtetuese nuk është privilegj i gjyqtarëve, por një shtyllë themelore e shtetit të së drejtës. Sipas saj, paanshmëria dhe pavarësia e këtij institucioni janë të garantuara me Kushtetutë dhe nuk mund të cënohen nga asnjë institucion, parti politike apo individ.
“Çdo përpjekje për të ushtruar presion mbi gjyqtarët kushtetues përbën shkelje të parimit të ndarjes së pushteteve dhe minon besimin e qytetarëve në sundimin e ligjit dhe në vetë demokracinë,” thekson Gjykata.
Vendimet e saj, sipas reagimit, mbështeten vetëm në Kushtetutë, në praktikën gjyqësore dhe në standardet ndërkombëtare për mbrojtjen e të drejtave dhe lirive themelore. Prandaj, çdo deklaratë që relativizon apo paragjykon vendimet e Gjykatës konsiderohet e papërgjegjshme dhe e dëmshme për zhvillimin demokratik të vendit.
Gjykata apelon tek të gjitha palët politike e institucionale që të respektojnë pavarësinë e saj, të përmbahen nga sulmet verbale ndaj gjyqtarëve dhe të kontribuojnë në forcimin e rendit kushtetues.
“Vetëm respektimi i këtij parimi themelor garanton një shoqëri të drejtë, demokratike dhe funksionale për të gjithë qytetarët e Kosovës,” përfundon reagimi.
