Gjykata Themelore në Gjilan ka miratuar kërkesën e Prokurorisë Themelore të Gjilanit dhe ka caktuar masën e paraburgimit prej një (1) muaji ndaj tre të pandehurve: B. K., B. P. dhe N. P., për shkak të dyshimit të bazuar se kanë kryer veprën penale “Ushtrimi i ndikimit”, sipas Kodit Penal të Republikës së Kosovës.
Sipas vendimit të gjykatës, janë plotësuar kushtet ligjore për caktimin e masës së paraburgimit, për shkak të peshës së veprës penale, mënyrës dhe rrethanave të kryerjes së saj, si dhe rrezikut të ndikimit në rrjedhën e procedurës penale. Të pandehurit dyshohet se kanë ushtruar ndikim të padrejtë mbi vendimmarrjen e një prokurori të shtetit, duke kërkuar të holla nga viktimat, me qëllim të ndërhyrjes në procese penale – veprime për të cilat janë arrestuar në flagrancë.
Gjykata ka vlerësuar gjithashtu se të pandehurit, për shkak të pozitave që kanë mbajtur më parë në sistemin e drejtësisë në Prizren (si avokat dhe zyrtar gjyqësor), si dhe për shkak të afërsisë shoqërore dhe miqësore me zyrtarë të ndryshëm, mund të ndikojnë në dëshmitarë dhe prova, duke rrezikuar zhvillimin e paanshëm të procesit.
Në veçanti, i pandehuri B. K. ka një të kaluar kriminale me 16 vepra penale të regjistruara, prej të cilave 13 për mashtrim.
Gjyqtari i procedurës paraprake ka konstatuar se masat alternative nuk do të ishin të mjaftueshme për sigurimin e prezencës së të pandehurve dhe për parandalimin e ndikimit në hetime, prandaj është caktuar masa e paraburgimit.
Palët kanë të drejtë ankese ndaj këtij vendimi në Gjykatën e Apelit të Kosovës.
