Marrëdhëniet mes Danimarkës dhe Shteteve të Bashkuara kanë hyrë në një fazë të re tensioni, pasi shërbimet daneze të inteligjencës kanë zbuluar një rrjet prej të paktën tre personash që dyshohet se po punojnë në Groenlandë për të krijuar ndarje mes ishullit dhe Danimarkës.
Sipas transmetuesit publik danez “DR”, këta individë janë të lidhur me rrethin e ish-presidentit amerikan Donald Trump, i cili më herët kishte shprehur hapur ambicien për ta bërë Groenlandën pjesë të SHBA-së.
Ministri i Jashtëm i Danimarkës, Lars Løkke Rasmussen, deklaroi se çdo përpjekje për ndërhyrje në punët e brendshme të Mbretërisë është “plotësisht e papranueshme”. Për këtë arsye, Kopenhaga ka thirrur të ngarkuarin me punë të SHBA-së, me të cilin pritet të zhvillojë një takim urgjent gjatë ditës.
Raportimet e “DR” theksojnë se një prej personave të dyshuar ka vizituar Groenlandën për të marrë pjesë në takime dhe për të hartuar një listë aleatësh e kundërshtarësh të mundshëm të planeve amerikane. Dy të tjerë dyshohet se janë angazhuar në ndërtimin e rrjeteve të kontakteve me politikanë, biznesmenë dhe liderë komunitarë. Emrat e tyre nuk janë bërë publikë për të mbrojtur burimet e informacionit.
Groenlanda, ishulli më i madh në botë, mbetet pjesë e Mbretërisë së Danimarkës, por gëzon status autonom dhe vetëqeverisës. Megjithatë, pozita e saj gjeostrategjike e bën atë objekt interesash të mëdha ndërkombëtare, veçanërisht nga Uashingtoni.
