Grupi i aktivistëve “Asnji Cent Ma Shumë” do të organizojë sot një aksion simbolik para Ministrisë së Ekonomisë në Prishtinë, për të protestuar kundër shtrenjtimit të çmimit të energjisë elektrike. Aksioni do të nisë në orën 07:30 dhe aktivistët ftojnë qytetarët të bashkohen për të shprehur kundërshtimin ndaj këtij rritje çmimi.
Në njoftimin e grupit thuhet: “Ju njoftojmë se nesër, më 2 prill (e mërkurë), me fillim nga ora 7:30 të mëngjesit, grupi i aktivistëve të grupit ‘Asnji Cent Ma Shumë’ organizon aksion simbolik para Ministrisë së Ekonomisë. Ju ftojmë të na bashkoheni!”
Ndryshe, është raportuar se rryma në Kosovë mund të shtrenjtohet për 15 për qind. Aktualisht, për konsumatorët që shpenzojnë deri në 800 kilovatë në orë brenda një muaji, çmimi i rrymës është 7.79 centë për kilovat. Pas shtrenjtimit të mundshëm, ky çmim do të rritej në 8.96 centë për kilovat.
Zyra e Regulatorit të Energjisë (ZRRE) shqyrton dhe cakton tarifat e energjisë elektrike çdo vit, dhe ato janë të vlefshme nga 1 prilli deri më 31 mars të vitit pasues. Sipas ZRRE-së, rritja e tarifave këtë vit është e domosdoshme për shkak të uljes së prodhimit të energjisë, rritjes së konsumit dhe varësisë nga importet me çmime të larta.
