Një megaoperacion i përbashkët i Guardia di Finanza dhe Drejtorisë Antimafia të Leçes ka shkatërruar më 2 tetor një rrjet të madh narkotrafiku italo-shqiptar, që vepronte midis Shqipërisë, Italisë dhe Spanjës.
Operacioni, i koduar “Gioele”, çoi në arrestimin e 29 personave, përfshirë edhe disa gra e familjarë të drejtuesve kryesorë të grupit. Baza e organizatës ishte në rajonin e Salentos, ndërsa në bastisje morën pjesë qindra forca policore, që sekuestruan drogë, para dhe mjete luksoze.
Hetimi dhe rrjeti ndërkombëtar
Sipas autoriteteve italiane, hetimet nisën gjatë pandemisë Covid-19 dhe zbuluan grupe të shumta kriminale të përbëra nga italianë dhe shqiptarë, si dhe një qytetar spanjoll. Organizata trafikonte tonelata droge nga Shqipëria drejt Italisë dhe më pas drejt Spanjës, duke përdorur një sistem logjistik të sofistikuar.
Hetimet kishin filluar që në vitin 2018 dhe vijuan me përgjime, survejime dhe sekuestrime, duke u intensifikuar në vitet e fundit.
Rezultatet e operacionit
Gjatë dy viteve të hetimit, autoritetet sekuestruan:
-
2,677 kilogramë drogë (kokainë, heroinë, hashash dhe marihuanë)
-
4,975 litra vaj hashashi
-
192,640 euro në para të gatshme
-
16 automjete dhe 4 anije, të përdorura për transportin e lëndëve narkotike
Sipas vlerësimeve të Guardia di Finanza, vlera totale e drogës në treg do të kishte arritur rreth 6 milionë euro.
Të dyshuarit dhe strukturat e rrjetit
Mes të arrestuarve figurojnë disa emra të njohur në botën e krimit shqiptar dhe italian, përfshirë:
-
Xhuljano Ajazay (28 vjeç), Julian Beqiraj (45), Alfred Feta (56), Lulezim Kule (49), Arjan Komini (44), Ervis Xhumbaraj (47), Sheptim Xhepa (43) dhe Kujtim Zeqe (53) – të gjithë me origjinë shqiptare.
-
Në mesin e të akuzuarve janë edhe Carlo Serio (51), banues në Ibiza, i dyshuar si bosi i kartelit, dhe Joan Herrera Sotorres (43) nga Barcelona.
Sipas hetuesve, Lulezim Kule dhe Carlo Serio janë identifikuar si dy figurat kryesore të rrjetit, me Kule-n që mbante lidhjet midis Shqipërisë dhe Spanjës, ndërsa Serio kontrollonte degën logjistike dhe shpërndarjen në Itali.
Hetimet vijojnë, ndërsa autoritetet italiane kanë paralajmëruar arrestime të tjera dhe sekuestrime shtesë në kuadër të këtij operacioni që konsiderohet një nga goditjet më të mëdha kundër narkotrafikut italo-shqiptar në vitet e fundit.
