Haliti deklaroi se edhe kandidati i PDK-së për president mund të propozohet nga Kurti, duke argumentuar se pa dakordim me kryeministrin nuk mund të ketë funksionim normal institucional.
“S’mund ta zgjedhim kandidatin tonë pa dashur Kurti. Nëse propozojmë një kandidat me të cilin ai mendon se nuk mund të bashkëpunojë, atëherë nuk funksionon. Duhet bashkëpunim president–kryeministër”, tha ai.
Sipas tij, mundësia për zgjedhjen e presidentit është aktualisht më e afërt sesa opsioni i zgjedhjeve të reja. Megjithatë, ai shtoi se një marrëveshje mes PDK-së dhe Lëvizja Vetëvendosje do të ulte tensionet politike, edhe pse personalisht është kundër një bashkëpunimi të tillë.
Kritika ndaj Osmanit
Duke folur për presidenten aktuale, Vjosa Osmani, Haliti e cilësoi mandatin e saj si jo-unifikues.
Ai tha se Osmani ka pasur momente të favorshme për Kosovën në arenën ndërkombëtare, por jo gjithmonë në harmoni me kryeministrin. Sipas tij, një nga detyrimet kryesore të presidentit është unifikimi i spektrit politik dhe përfaqësimi gjithëpërfshirës.
“Presidentja në asnjë udhëtim zyrtar nuk e ka marrë me vete përfaqësues nga opozita. Në shumë vende të botës, presidentët përfshijnë edhe pozitën dhe opozitën në delegacione, madje edhe përfaqësues të biznesit, varësisht nga natyra e takimeve”, deklaroi Haliti.
Ai shtoi se shumica e takimeve ndërkombëtare të Osmanit kanë qenë në kuadër konferencash apo tryezash joformale, ndërsa sipas tij takimet dypalëshe me peshë simbolike dhe protokollare kanë qenë të pakta.
