Deputeti i Partia Demokratike e Kosovës, Xhavit Haliti, ka deklaruar se zgjedhja e presidentit të Kosovës duhet të bëhet përmes një marrëveshjeje politike dhe jo si rezultat i vullnetit të vetëm një partie.
Në një prononcim për Tëvë1, Haliti tha se nuk është praktike që Lëvizja Vetëvendosje t’i ketë të gjitha pushtetet, duke nënvizuar se presidenti duhet të jetë figurë e pranueshme për të gjitha palët politike dhe në shërbim të interesave të vendit.
“Politikisht dhe si praktikë nuk do të ishte e mirë që VV t’i kishte të gjitha pushtetet. Partitë nuk duhet të shkojnë me emrat e tyre për president, sepse asnjëra s’mund ta zgjedhë e vetme. Duhet një marrëveshje politike”, tha Haliti.
Ai shtoi se për postin e presidentit nuk mund të bëhet koalicion me LVV-në, pasi koalicionet, sipas tij, formohen për qeveri dhe jo për zgjedhjen e kreut të shtetit.
Duke komentuar emrat e përfolur, Haliti tha se një president duhet të ketë përvojë të thellë politike dhe institucionale. Ai përmendi se Vjosa Osmani ka ushtruar mandatin pesëvjeçar, ndërsa Glauk Konjufca ka përvojë si kryetar i Kuvendit, por theksoi se zgjedhja duhet të jetë rezultat i një konsensusi më të gjerë.
Haliti shprehu gjithashtu dyshime për vullnetin e kryeministrit Albin Kurti për të arritur marrëveshje për presidentin, duke thënë se personalisht nuk beson se Kurti është i interesuar që procesi të përmbyllet me sukses në këtë fazë.
