Fëmijët e kryeqytetit do të kenë tani një ambient të ri e modern për lexim dhe mësim. Në Pallatin e Rinisë u pranua sot një donacion i rëndësishëm për Bibliotekën e Fëmijëve, në një ceremoni ku morën pjesë Kryetari i Komunës së Prishtinës, Përparim Rama, dhe Drejtori i Arsimit, Samit Shahini.
Kontributi u mundësua nga znj. Emina Cunmulaj dhe organizata The Library Project – Kosova, të cilët u vlerësuan për rolin e tyre të jashtëzakonshëm në realizimin e këtij projekti.
Falë këtij bashkëpunimi, fëmijët e Prishtinës do të kenë qasje në hapësira të reja leximi, të dizajnuara për të qenë të ngrohta dhe frymëzuese, me qëllim që të nxisin dashurinë për librin dhe për dijen.
Ky projekt shënon një hap të rëndësishëm drejt përmirësimit të kushteve arsimore dhe kulturore për gjeneratat e reja në kryeqytet.
