Komisioni Qendror i Zgjedhjeve (KQZ) ka hapur zyrtarisht sot afatin për aplikimin e subjekteve politike që synojnë të marrin pjesë në Zgjedhjet Lokale të 12 tetorit. Nga sot e deri më 13 gusht 2025, partitë politike, koalicionet, iniciativat qytetare dhe kandidatët e pavarur mund të aplikojnë për certifikim dhe të dorëzojnë listën e kandidatëve të tyre për kryetarë komunash dhe për Kuvendet Komunale.
Zëdhënësi i KQZ-së, Valmir Elezi, konfirmoi për RTKLive se kjo periudhë zgjat 49 ditë dhe është një hap vendimtar për të gjitha subjektet që duan të jenë pjesë e procesit zgjedhor. “Aplikimi bëhet në Zyrën për Regjistrim, Certifikim dhe Kontrollin Financiar të Subjekteve Politike pranë KQZ-së,” tha Elezi.
Sipas tij, aplikimi mund të bëhet edhe online, duke lehtësuar procedurat për subjektet që dëshirojnë të garojnë. “Është në vullnetin e subjekteve politike të zgjedhin në cilat komuna do të garojnë dhe nëse do të marrin pjesë vetëm për Kryetar Komune, vetëm për Kuvend Komunal apo për të dyja së bashku,” shtoi ai.
Zgjedhjet Lokale të 12 tetorit pritet të shënojnë një garë të gjerë demokratike në të gjitha komunat e Kosovës, ndërsa KQZ-ja u bën thirrje të gjithë pjesëmarrësve të respektojnë afatet ligjore dhe procedurat përkatëse.
