Kryetari i AAK-së, Ramush Haradinaj, ka ngritur alarmin për manipulim serioz të votës së qytetarëve, pas rinumërimit të pjesshëm të votave të kandidatëve nga zgjedhjet e 28 dhjetorit.
Përmes një reagimi publik, Haradinaj tha se gjetjet e deritanishme po nxjerrin në pah një skemë shqetësuese manipulimi, duke theksuar se procesi zgjedhor është dëmtuar rëndë që në këtë fazë.
“Rinumërimi i pjesshëm po e nxjerr në shesh një skemë manipulimi të përmasave shqetësuese. Procesi i këtyre zgjedhjeve qysh sot është lënduar,” deklaroi ai.
Sipas Haradinajt, vetëm rinumërimi i plotë, votë për votë, mund të garantojë integritetin e zgjedhjeve. Çdo alternativë tjetër, tha ai, nuk siguron besueshmëri dhe rrezikon seriozisht demokracinë.
Ai shprehu habi për mungesën e reagimit të organeve të drejtësisë, duke pyetur pse Prokuroria ende nuk është vënë në lëvizje, pavarësisht gjetjeve alarmuese.
“Demokracia nuk mund të jetë viktimë e një grushti hajdutësh,” theksoi Haradinaj, duke apeluar tek të gjithë mekanizmat institucionalë që, përmes vendimeve dhe veprimeve konkrete, të mbrojnë votën e qytetarit.
Në fund, ai paralajmëroi se mosveprimi do të ketë pasoja të pariparueshme, duke e cilësuar mbrojtjen e integritetit zgjedhor si një domosdoshmëri absolute për stabilitetin demokratik të vendit.
Apeli i Haradinajt vjen në një moment kur besimi publik në procesin zgjedhor po vihet seriozisht në pikëpyetje, ndërsa presioni për transparencë dhe përgjegjësi institucionale po rritet nga ora në orë.
