Kryetari i Aleancës për Ardhmërinë e Kosovës, Ramush Haradinaj, ka kujtuar luftëtarin e Ushtrisë Çlirimtare të Kosovës, Agron Gjocaj, duke theksuar trimërinë dhe sakrificën e tij në luftën për liri.
Haradinaj ka shkruar se Agron Gjocaj ishte një ushtar i përpiktë dhe i guximshëm, i cili gjithmonë gjendej në vijën e parë të frontit në Zonën e Dukagjinit, aty ku e kërkonte nevoja e luftës.
Sipas tij, Gjocaj kishte lindur në Baballoq të Deçanit dhe ishte rritur në një familje me frymë të fortë patriotike nga prindërit Sadri dhe Zejnepe Gjocaj. Ai iu bashkua Ushtrisë Çlirimtare të Kosovës së bashku me vëllanë e tij Dinën, si dhe me familjarë të tjerë, duke e kthyer sakrificën për liri në një mision familjar.
Haradinaj theksoi se përveç pjesëmarrjes në shumë beteja, Agron Gjocaj kishte luajtur rol edhe në furnizimin me armatim, një element jetik për vazhdimin e luftës në atë kohë.
Ai ra dëshmor më 18 gusht në trekufirin Kosovë–Shqipëri–Mal i Zi, së bashku me bashkëluftëtarët Avni Bali Sinanaj dhe Milaim Rexhë Gjocaj.
Sipas Haradinajt, nga sot trupi i tij do të prehet në Kompleksin Memorial të Dëshmorëve në Baballoq, pranë bashkëluftëtarëve të tij.
“Lavdia e Agron Gjocajt është e përjetshme dhe kujtimi për të do të mbetet gjithmonë i gjallë në zemrat tona”, ka shkruar Haradinaj, duke shprehur mirënjohje të përjetshme për sakrificën e tij në shërbim të atdheut.