Aktivisti shqiptaro-amerikan Harry Bajraktari po lobon në Shtetet e Bashkuara të Amerikës për t’u bërë president i Kosovës, pavarësisht se javë më parë kishte shprehur publikisht përkrahje për një mandat të dytë të presidentes aktuale, Vjosa Osmani.
Sipas burimeve të ndryshme në Washington DC dhe New York, Bajraktari po zhvillon lobime me kongresistë amerikanë që merren me çështjet e Kosovës, mes tyre edhe kongresistin Richie Torres, me synimin që të konsiderohet si kandidat për postin e presidentit të vendit.
Gazetari Xhemajl Rexha raporton se Bajraktari shpreson që Lëvizja Vetëvendosje të mos e nominojë sërish Vjosa Osmanin për presidente dhe po përpiqet të prezantohet si një kandidat konsensual për këtë pozitë.
Bajraktari njihet për lidhje të afërta me Aleancën për Ardhmërinë e Kosovës dhe me vëllezërit Haradinaj, ndërsa ka raporte të mira edhe me individë nga parti të tjera politike.
Megjithatë, ai nuk u është përgjigjur kërkesave për koment lidhur me këto raportime.
Ironikisht, vetëm disa javë më parë Bajraktari kishte bërë thirrje publike që deputetët e Kuvendit të Kosovës, si nga pozita ashtu edhe nga opozita, ta votojnë Vjosa Osmanin për një mandat të dytë në krye të shtetit.
Procesi për zgjedhjen e presidentit pritet të zhvillohet së shpejti, pasi kanë mbetur më pak se dy javë deri në afatin për zgjedhjen e kreut të ri të shtetit. Kryeministri Albin Kurti ka deklaruar së fundmi se Vjosa Osmani nuk është kandidatja e tij për presidente.Burimi: Reporteri.net / “Interaktiv Talks”
