Nait Hasani ka thënë se vazhdimi i pamasë i seancës konstituive e ka munduar atë dhe deputetët e tjerë, të cilët obligohen të udhëtojnë nga të gjitha rajonet e vendit për të dëgjuar një “frazë të njëjtë”.
Deputeti i Partisë Demokratike të Kosovës tha se derisa nuk arrihet marrëveshje politike për konstituimin e Kuvendit, do të ishte më mirë për deputetët do të jetë të mos vijnë fare.
“Më mirë është të vijnë vetëm kryetarët e partive dhe të na përfaqësojnë. Cila është arsyeja me na mundu neve me ardhë këtu”, tha ai.
Hasani paralajmëroi mungesë që nga seanca e radhës.
“Unë për herë të fundit sot vi. 30-të herë, në libër të Guiness-it jemi”, u shpreh i zemëruar Hasani.
I pyetur për takimet e tij me deputetët e Lëvizjes Vetëvendosje, Shqipe Mehmeti-Selimi dhe Arben Vitija, ai tha se nuk e ka problem të takojë deputetë të partisë fituese. Tha se është gjë normale, e cila nuk lidhet me qëndrimin e tij politik.
“Ne jemi familjarë me z. Selimi. Me Shqipen njihemi që herët. Cila është arsyeja? Mos me bisedu unë me Shqipen. Ne nuk jemi armiq mes veti, ne jemi vetëm kundërshtarë politik. Takohem edhe me Albinin, edhe me Glaukun, takohem edhe me Shqipen, edhe me Albulenën. Nuk e kam atë ngarkesë. Problemi është te kryetarët e partive, partia e parë është ajo që e hap mundësinë. Unë e kam bërë publike qëndrimin tim: po, jam për zgjidhje”, tha ai.
Sipas Hasanit, faji është i partisë fituese dhe kryetarit të saj, Albin Kurtit.
“Ai duhet ta kuptoj njëherë e përgjithmonë, është parti e parë por nuk i ka fituar zgjedhjet”, tha ai.
