Nënkryetarja e Kuvendit të Kosovës Albulena Haxhiu, dhe deputeti Hekuran Murati deklaruan se edhe këtë herë anëtarët e komunitetit serb nuk arritën të sigurojnë votat e nevojshme për zgjedhjen e nënkryetarëve të Kuvendit të Kosovës. Si rjedhojë, ata theksuan se institucionet nuk mund të mbeten peng i mungesës së zgjedhjes së përfaqësuesve të komunitetit serb, pasi të gjithë nënkryetarët e tjerë janë zgjedhur.
Murati vuri në dukje se LVV nuk ka qëllim të bllokojë institucionet, çka është evident edhe gjatë procesit të votimit. Sipas tij, përkundër sulmeve të kryetarit të PDK-së, Memli Krasniqi, dhe përfaqësueses së LDK-së, Hykmete Bajrami, bllokuesit realë ishin vetë PDK dhe LDK, pasi PDK votoi kundër, ndërsa LDK, e cila ishte prezente në Kuvend, nuk mori pjesë në votim. Murati i cilësoi veprimet e dy subjekteve si hipokrizi dhe naivitet politik, duke i kritikuar për pretendimet e tyre se zgjedhjet për nënkryetarë përbëjnë shkelje kushtetuese.
Ai shtoi se, nëse nuk ka alternative tjetër nga opozita, LVV është e gatshme të shkojë në zgjedhje për të hapur rrugë krijimit të institucioneve, megjithëse LVV mbetet e interesuar të formojë qeverinë.
Nga ana e saj, Albulena Haxhiu theksoi rëndësinë që partitë të marrin pjesë në takimet e thirrura nga kryetari i Kuvendit dhe të respektojnë procesin institucional, duke i dhënë mandatari për formimin e qeverisë LVV-së. Haxhiu e konsideroi qesharake pretendimin e opozitës se LVV nuk dëshiron të konstituojë institucionet, duke shtuar se veprimet e partisë së saj janë në përputhje me vendimet e Gjykatës Kushtetuese dhe me frymën e ligjit.
Ky qëndrim i LVV-së vjen në një moment të tensionuar politik, ku partitë opozitare dhe përfaqësuesit e komunitetit serb vazhdojnë të mos arrijnë konsensus për zgjedhjen e nënkryetarëve, duke ndikuar në rrjedhën e konstituimit të Kuvendit.
