Shqipëria ndodhet sot në heshtje zgjedhore, një ditë përpara se mbi 3.7 milionë qytetarë me të drejtë vote t’i drejtohen kutive për të zgjedhur 140 përfaqësuesit e rinj në Kuvendin e Shqipërisë.
Një risi historike e këtyre zgjedhjeve është pjesëmarrja e diasporës shqiptare, ku 245,935 emigrantë të regjistruar do të kenë për herë të parë mundësinë të votojnë për Parlamentin e ri.
Në garë për shumicën parlamentare janë 11 subjekte dhe koalicione politike, me kandidatë të renditur në lista të hapura dhe të mbyllura. Çdo subjekt paraqitet me 186 kandidatë, ku 46 prej tyre janë nga lista e mbyllur, sipas formularëve zyrtarë të KQZ-së.
Fushata zgjedhore u mbyll mbrëmjen e së premtes në kryeqytet me dy mitingje të mëdha nga Partia Socialiste dhe Partia Demokratike. Socialistët zgjodhën Parkun Olimpik për mbylljen, ndërsa demokratët zhvilluan mitingun e tyre në Bulevardin e Ri. Atmosfera ishte e mbushur me flamuj kuqezi, flamuj të Bashkimit Europian dhe të Shteteve të Bashkuara.
Në përmbyllje të fushatës, kryeministri Edi Rama, i shoqëruar nga bashkëshortja Linda Rama, kërkoi një mandat të katërt për të çuar Shqipërinë drejt integrimit europian. Ndërsa Sali Berisha, i shoqëruar nga strategu amerikan Cris LaCivita, përsëriti zotimet për ulje taksash dhe rritje pagash e pensionesh.
Tashmë, vëmendja është përqendruar te dita e dielë, kur qytetarët do të vendosin me votën e tyre për drejtimin e ardhshëm politik të vendit. Votimet nisin në orën 07:00 dhe mbyllen në orën 19:00 në të gjithë territorin e Shqipërisë.
