Gjigandi kinez i teknologjisë, Huawei, ka zbuluar një nga grupimet më të fuqishme të inteligjencës artificiale në botë, ndërsa synon të zvogëlojë varësinë nga çipat amerikanë dhe të forcojë teknologjinë kineze.
Në Huawei Connect 2025, kompania prezantoi katër versione të reja të çipit Ascend AI, që do të lançohet gjatë tre viteve të ardhshme: Ascend 950 (2026), Ascend 960 (2027) dhe Ascend 970 (2028), pas lansimit të Ascend 910C në tremujorin e parë të këtij viti.
“Fuqia kompjuterike ka qenë gjithmonë dhe do të vazhdojë të jetë çelësi i inteligjencës artificiale, veçanërisht për Kinën,” tha Eric Xu, nënkryetar i Huawei, gjatë konferencës.
Përveç çipave të rinj, Huawei prezantoi sistemet superkompjuterike Atlas 950 dhe Atlas 960, të cilat kompjuterizojnë përkatësisht 8,192 dhe 15,488 çipa, duke u konsideruar si supergrupime dhe më të fuqishmit në botë. Këto sisteme bazohen mbi Atlas 900 të mëparshëm, i cili operonte me 384 çipa Ascend 910C.
Çipat dhe supergrupimet do të formojnë infrastrukturën e inteligjencës artificiale të Huawei, duke lidhur supernyje të shumta dhe duke mundësuar aplikime të avancuara në telekomunikacion, prodhim dhe industri të tjera. Kompania ka instaluar mbi 300 supernyje Atlas 900 A3 në më shumë se 20 klientë.
Shtetet e Bashkuara kanë ndaluar përdorimin e produktëve të tyre më të avancuar të inteligjencës artificiale nga Kina, duke përfshirë çipat H100 dhe H200 të Nvidia-s, duke shtyrë Pekinin të zhvillojë alternativat e tij kombëtare. Huawei pretendon se produktet e tij do të jenë “përpara në të gjitha frontet” krahasuar me Nvidia-n deri vitin e ardhshëm.
Rivaliteti SHBA-Kinë po intensifikohet, ndërsa Pekini ka zgjeruar hetimet ndaj Nvidia-s për praktika të dyshuara monopoliste, duke rritur presionin mbi firmën amerikane. Shefi i Nvidia-s, Jensen Huang, e ka pranuar Huawei-n si një konkurrent të fortë dhe të frikshëm.
Ekspertët vlerësojnë se zbulimi i supergrupit të Huawei mund të ndikojë ndjeshëm në zinxhirët globalë të furnizimit, ekonominë globale dhe zhvillimin e arkitekturave të reja të inteligjencës artificiale.
