Kryetari i Organizatës së Veteranëve të Luftës së UÇK-së, Hysni Gucati, ka ngritur shqetësime serioze lidhur me refuzimin e kërkesave të tij për të vizituar ish-krerët e Ushtrisë Çlirimtare të Kosovës që ndodhen në paraburgim në Hagë. Ai deklaroi se administrata e burgut ka refuzuar tri herë kërkesat e tij, pa dhënë asnjë shpjegim zyrtar për këtë vendim.
“Refuzimi më bëhet jo nga Gjykata Speciale, por nga administrata e burgut – gjë që nuk ka ndodhur asnjëherë më parë. Kjo tregon që po shkelin të drejtat e njeriut,” u shpreh Gucati në një deklaratë publike.
Sipas tij, kërkesat ishin bërë për të vizituar Jakup Krasniqin, Hashim Thaçin, Kadri Veselin, Rexhep Selimin, Pjetër Shalën dhe Sali Mustafën. Pavarësisht përgatitjeve për udhëtim, ai nuk ka marrë asnjë arsyetim për refuzimet.
“Sot i jam drejtuar me email për të kërkuar arsyen dhe jam në pritje të përgjigjes. Do të bëj kërkesa vazhdimisht, nuk do të ndalem asnjëherë,” theksoi Gucati.
Ai shtoi se një leje për vizitë i ishte dhënë vëllait të ish-presidentit Hashim Thaçi, duke e cilësuar këtë si trajtim të pabarabartë dhe selektiv nga autoritetet.
Ky zhvillim ka ngritur pikëpyetje të reja mbi qasjen e institucioneve në Hagë ndaj të drejtave të të paraburgosurve dhe atyre që kërkojnë t’i vizitojnë.
