Sanksionet perëndimore po kanë ndikim të ndjeshëm dhe gjithnjë e më të dukshëm në ekonominë e Rusisë dhe mund ta çojnë situatën financiare të Moskës drejt paqëndrueshmërisë gjatë vitit 2026, ka deklaruar i dërguari special i BE-së për sanksionet, David O’Sullivan.
Në një intervistë për The Guardian, O’Sullivan tha se, ndonëse sanksionet gjithmonë mund të anashkalohen pjesërisht, pas katër vitesh është e qartë se ato po funksionojnë.
Ai theksoi se ekonomia ruse është shtrembëruar rëndë nga orientimi drejt luftës, në dëm të sektorit civil, duke krijuar presione serioze afatmesme.
Deklaratat vijnë në një moment kur Rusia ka intensifikuar sulmet ndaj infrastrukturës energjetike të Ukrainës, ndërsa vendi po përballet me temperatura deri në –20°C. Sipas autoriteteve ukrainase, Moska ka përdorur dyfish më shumë dronë dhe raketa krahasuar me janarin e vitit 2025.
Treguesit ekonomikë në rënie
Sipas O’Sullivan, lufta po i kushton shtrenjtë ekonomisë ruse:
-
Të ardhurat nga nafta janë në rënie
-
Inflacioni ka arritur rreth 6%
-
Normat e interesit janë rritur në 16%
-
Të ardhurat nga nafta dhe gazi u përgjysmuan në janar, niveli më i ulët që nga viti 2020
Që nga pushtimi i Ukrainës në vitin 2022, BE-ja ka miratuar 19 paketa sanksionesh, duke synuar mbi 2,700 individë dhe subjekte, si dhe sektorë kyç si energjia, aviacioni, teknologjia, diamantet dhe ari.
Frenimi i anashkalimit të sanksioneve
O’Sullivan tha se BE-ja ka pasur sukses të konsiderueshëm në frenimin e anashkalimit të sanksioneve, veçanërisht duke bllokuar rieksportin e komponentëve ushtarakë përmes:
-
Azisë Qendrore
-
Turqisë
-
Emirateve të Bashkuara Arabe
Ai theksoi se shumica e shkeljeve kryhen nga aktorë privatë për përfitim ekonomik, e jo drejtpërdrejt nga qeveritë.
Sipas tij, Kina mbetet përjashtim, duke i ofruar Rusisë mbështetje indirekte, edhe pse jo armë direkte. Ndërkohë, BE-ja ka vendosur sanksione ndaj rreth 600 anijeve të “flotës në hije” ruse, që përdoren për eksportin e naftës drejt Kinës dhe Indisë.
BE-ja, përfundoi O’Sullivan, do të vazhdojë përpjekjet për të bindur vendet partnere të mos lejojnë rishitjen e mallrave evropiane që mund të përdoren për qëllime ushtarake nga Rusia.
