Policia e Kosovës, me urdhër të Prokurorisë Speciale, ka arrestuar të hënën një person me inicialet D.N., i cili dyshohet për pjesëmarrje në krime lufte kundër popullsisë civile gjatë luftës së Kosovës.
Arrestimi u krye në pikëkalimin kufitar Dheu i Bardhë, ndërsa sipas Prokurorisë Speciale, i dyshuari akuzohet se në periudhën 13–30 prill 1999, në bashkëkryerje me forcat policore dhe ushtarake serbe, ka marrë pjesë në vrasjen e 25 civilëve shqiptarë në Komunën e Gjilanit.
Brenda afateve ligjore, Prokuroria ka paralajmëruar se do të kërkojë masën e paraburgimit ndaj të dyshuarit në Gjykatën Themelore të Prishtinës, Departamenti Special.
