Revolucioni i inteligjencës artificiale ka hyrë zyrtarisht në zemrën e politikës britanike — dhe po përmbys gjithçka. Nga shkrimi i fjalimeve deri te hartimi i politikave, deputetët dhe lobistët në Westminster po përdorin gjithnjë e më shumë mjete të IA-së për t’u kursyer kohë. Por ndërsa teknologjia avancon, pyetjet mbi të ardhmen e punës dhe rolin e njerëzve në politikë po bëhen alarmante.
AI po bën pjesën “e lodhshme”: skanimin e dokumenteve të gjata, kërkimin në Hansard, monitorimin e medias dhe madje edhe hartimin e njoftimeve për shtyp. Qeveria britanike ka krijuar madje edhe “Parlex”, një mjet kërkues që rrëmon qëndrimet e deputetëve në sekonda — diçka që dikur kërkonte staf të tërë.
“Në çështjet publike do të shkruash më shpejt, do të komunikosh më thjeshtë. Ka një anë pozitive,” thotë Peter Heneghan, ish-zyrtar i komunikimeve në Downing Street.
“Por ka edhe anën tjetër: shumë role thjesht do të zhduken.”
Stafi i Westminsterit në alarm: ‘Robotët po flasin me robotët’
Rritja e IA-së ka sjellë një valë të frikshme email-esh të gjeneruara automatikisht nga fushata të ndryshme. Deputetët ankohen se janë të mbingarkuar me mesazhe copy-paste me cilësi të ulët. Disa paralajmërojnë se shumë shpejt komunikimi me zgjedhësit mund të përfundojë si një farsë: “IA që flet me IA”.
“Kjo është e dëmshme për demokracinë,” thotë Tom Hashemi i Cast from Clay.
“Deputetët janë aty për t’u përgjigjur njerëzve të vërtetë, jo robotëve aktivistë.”
Tregu i punës po tkurret — dhe të rinjtë të parët në rrezik
Ndërsa IA bëhet standard, vendet e punës së ulëta në hierarki po zhduken. Pikërisht ato punë ku brezi i ri politik zakonisht fillon karrierën.
Heneghan paralajmëron një “shtrëngim masiv” punësimi:
-
Analistët
-
Asistentët
-
PR-istët e rinj
-
Stafi i burimeve njerëzore
-
Madje edhe rolet e shitjeve
të gjithë mund të preken.
Sado banale të duken këto detyra, shumë figura të rëndësishme të politikës britanike kanë nisur pikërisht aty: duke kërkuar, fotokopjuar dhe skanuar dokumente. Sot, të rinjtë rrezikojnë të mos kenë më qasje në këtë “shkollë praktike” të Westminsterit.
IA nuk është gati të bëhet deputet — ende
Pavarësisht gjithçkaje, shumica e stafit parlamentar thonë se IA nuk mund të shkruajë një fjalim të mirë. Është shumë e lehtë për t’u dalluar. Por mund të bëhet shumë shpejt mjeti i parë për hartimin e materialeve politike, ndërsa njerëzit bëhen thjesht “kontrollues cilësie”.
Eksperimenti i parë i një deputeti që krijoi versionin e vet me IA dështoi spektakularisht: çorientoi gazetarë me theksin, dha këshilla për marrëdhënie dhe shpiku haiku të çuditshëm për politikanët rivalë.
Sot është humor. Nesër mund të jetë realitet.
E ardhmja e politikës britanike? Robotë më të shpejtë, punë më pak dhe demokraci më e brishtë
Ndërsa inteligjenca artificiale po evoluon me shpejtësi marramendëse, frika është se mund të transformojë jo vetëm mënyrën si qeveriset vendi, por edhe vetë demokracinë.
Nëse sot IA po mban shënime, nesër mund të marrë vendime. Dhe në Westminster, shumë pyesin: A është brezi i ardhshëm politik thjesht një viktimë e paevitueshme e epokës së robotëve?
