Presidenti i Partisë së Lirisë, Ilir Meta, nuk ka arritur të sigurojë një mandat në parlamentin e ardhshëm, pas garës në qarkun e Tiranës në kuadër të koalicionit opozitar “Për Shqipërinë Madhështore”, të drejtuar nga Partia Demokratike dhe Sali Berisha.
Në një reagim të shpërndarë në Facebook nga ambientet e burgut, Meta falënderoi rreth 8 mijë qytetarë që votuan për të më 11 maj, duke i cilësuar ata si “heronj” që, sipas tij, i rezistuan presioneve të një “makinerie kriminale shtetërore”.
“Për mua ata nuk janë votues, por heronj dhe do të gëzojnë përjetë të gjithë mirënjohjen time të pakufijshme”, shkruan Meta, i cili akuzon ashpër qeverinë për “cenim të demokracisë, shtetit të së drejtës dhe standardeve zgjedhore”.
Ish-presidenti u distancua publikisht nga çdo mundësi për të marrë një mandat përmes dorëheqjes së kandidatëve të Partisë së Lirisë në listën e Tiranës. Ai e konsideroi një veprim të tillë në kundërshtim me parimet e tij politike.
“Që nga viti 2008, që kur u bënë ndryshimet e mbrapshta kushtetuese, kam luftuar për përfaqësim vetëm nëpërmjet vullnetit të lirë dhe të hapur të qytetarëve. Nuk mund të pranoj asnjë marifet apo zgjidhje pragmatiste që shkon në kundërshtim me kauzat për të cilat kam luftuar”, theksoi Meta në reagimin e tij.
Ai gjithashtu shprehu mirënjohje për Tedi Blushin dhe strukturat e Partisë së Lirisë për angazhimin në një fushatë që e përshkroi si “të pabarabartë dhe të mbushur me pabesi”.
Meta përfundoi deklaratën me një falënderim për komisionerët, numëruesit dhe vëzhguesit, të cilët sipas tij po vijojnë me përgjegjësi të mbrojnë çdo votë.
Ky zhvillim shënon një humbje të rëndësishme për Partinë e Lirisë dhe për vetë Metën, i cili për herë të parë pas më shumë se dy dekadash nuk do të jetë pjesë e legjislativit shqiptar.
