Sipas të dhënave zyrtare të publikuara nga Ferat Shala, ish-ministër dhe deputet i Kuvendit të Kosovës, importi i energjisë elektrike në vend ka arritur në nivelin më të lartë të dekadës, duke reflektuar një varësi në rritje nga tregjet e jashtme.
Grafiku tregon se nga 890 mijë MWh në vitin 2019, Kosova ka arritur në 1.37 milionë MWh në vitin 2024, një rritje prej mbi 50%. Në të njëjtën periudhë, shpenzimet për import janë trefishuar, nga rreth 50 milionë euro në mbi 168 milionë euro.
Sipas Shalës, kjo situatë është pasojë e performancës së dobët të prodhimit vendor, sidomos në termocentralet e KEK-ut, të cilat prej vitesh përballen me defekte të shpeshta, riparime të gjata dhe mungesë efikasiteti.
“Çdo mungesë në prodhim duhet mbuluar me import, shpesh me çmime të larta, duke krijuar hapësirë për përfitime të ndërmjetësve dhe tregtarëve. Në fund, barrën e paguajnë qytetarët, përmes rritjes së tarifave të aprovuara nga ZRRE,” theksoi Shala.
Ai e cilësoi situatën aktuale si krizë të krijuar nga keqqeverisja, duke akuzuar Qeverinë për mungesë të koordinimit dhe vizioni në politikën energjetike.
Shala kërkoi investime të qëndrueshme në kapacitete të reja prodhuese, përmirësim të menaxhimit në KEK dhe zbatim të detyrimeve ligjore në planifikimin energjetik, duke theksuar se siguria energjetike është themeli i stabilitetit ekonomik.
“Sa më shpejt të largohet ky mentalitet që bllokon zhvillimin e projekteve të reja, aq më shpejt qytetarët do të kenë furnizim të qëndrueshëm dhe çmime të përballueshme,” përfundoi ai.
