Një mosmarrëveshje në komunikacion ka përfunduar me dhunë në rrugën e Pejës në Fushë Kosovë, ku një person dyshohet se ka sulmuar me thikë një tjetër dhe i ka shkaktuar dëme materiale në veturë.
Policia e Kosovës njofton se rasti ka ndodhur të shtunën, më 5 korrik 2025, rreth orës 15:40, ku pas një konflikti verbal ndërmjet dy drejtuesve të automjeteve, njëri prej tyre ka përdorur një mjet të mprehtë – thikë, duke e sulmuar fizikisht viktimën dhe duke dëmtuar veturën e tij.
“I dyshuari është arrestuar dhe pas intervistimit, me vendim të prokurorit, është dërguar në mbajtje,” thuhet në raportin 24-orësh të Policisë së Kosovës.
Ndaj të arrestuarit rëndojnë dyshimet për veprat penale “Sulm” dhe “Asgjësim apo dëmtim i pasurisë”, ndërsa hetimet për zbardhjen e plotë të rrethanave të incidentit janë duke vazhduar.
Autoritetet kanë apeluar për qetësi dhe vetëpërmbajtje në trafik, duke theksuar se çdo veprim i dhunshëm në rrugë rrezikon sigurinë publike dhe sjell pasoja ligjore për autorët.
