Inspektorati Policor i Kosovës (IPK) ka njoftuar se ka rekomanduar suspendimin nga detyra të dy zyrtarëve policorë të Stacionit Policor në Rahovec, që veprojnë në kuadër të Drejtorisë Rajonale të Policisë në Gjakovë.
Sipas komunikatës zyrtare të IPK-së, hetuesit kanë ndërmarrë veprime fillestare hetimore lidhur me një rast në Rahovec, ku dyshohet se janë përfshirë dy pjesëtarë të Policisë së Kosovës.
Bazuar në të dhënat preliminare dhe provat e siguruara deri më tani, ekziston dyshimi i arsyeshëm se të njëjtit mund të kenë kryer veprën penale “Keqpërdorim i pozitës apo autoritetit zyrtar”.
Hetimet po zhvillohen nga Departamenti i Hetimeve i IPK-së, në bashkëpunim me Prokurorinë e Shtetit, me qëllim të sqarimit të plotë të rrethanave dhe veprimeve të mundshme të kundërligjshme të zyrtarëve policorë të përfshirë.
IPK thekson se rekomandimi për suspendim të përkohshëm është ndërmarrë për të parandaluar ndikimin në procesin hetimor dhe për të garantuar pavarësinë dhe paanshmërinë e hetimeve.
